الجنه و الشريكه والنبته

.
كان ف زمان الجهل
سيد الحُكّام
العالي ف لقوم
ميترد عليه لكلام
ولي گالو يطبق فلحال
ؤكانت هي القاعده السايده
فكل مكان وزمان قبل الاسلام

تا من البيوت كلشي بلَحكام
بقينا فنفس الاحوال
تا رسالة الاله بانت لها علامات
سيد الخلق ظهر نور فكل مكان
ورفع شعار الحوار والمساواة
ناضو عليه عُبّاد اللات
كيفاش نعيش مساوين
مع لي كانو لينا خدامين
ؤ كيفاش المراة
يولي لها حق بعد ماكانت جاريه
وتحت رجلينا عاشت
وغادي تبقى ديما عندنا لتحت
حيت كلما ضصرت فوقنا طلعات
عقليه جدورها من الانسانيه تردمات

من يومها والحرب زادت
شي ردها كي كانت
ؤشي حل باب التغيير تا للمعقول فاتت
شي گال هي غير للولاده ؤ دار
ؤشي شايفها غير للرغبه همو لكادر
ؤ شي گال هي سباب العداب ؤ القهر
ؤ قليل لي يحسبها نسمه من زهر
ؤ ورده كلما تسقات تعطر
نسَّا بِنَا تكمل

برفقتنا العيشة بهم تحلا وتطرب
وبهم حنا ك نجمه مع الگمر
نورهم يسحر الگلب بالنظر
وحنا نجوم هي بينا ساس و عْمر
ؤ عيبنا عقليه قديمه جارانا لور
مزاله فلقاع مبغات تحرر
عايشه فزريبه ك الثور
ينطح ومع اي حاجه تخالف التقاليد يفور
عقل قد نمله ؤ منفوخ أديكور
فرز المعنى وفهم اش بين سطور

كون رحيم وفقلبك محنه
قدر لي فكرشها هزاتك شهور
تا قربت السنه
ؤباتت ليالي على فراشك سهرانه
تغسل لك وتمسح دموعك بكل محبه
غلاوتك ما تمسحها السنين الفايته
ولا تتبدل واخا تنكر لي عطاتك المسكينه
تتشوفك كملت دينك
ؤ يخفاف حملها واخا ليك تبقى مشوقه

ياك الفرح كمل وهانتا بين يدين أمْره اخرى
بايت بالمحبه والغزل ف جنه
بلا منفتح اسرار ديك الليله
الحياة الزينه

الحياة الزينه بينا كاملين راها تحلا
خود مني الفايده
المراه من المراه تختلف ك الفاكهة
لكن سقيها بماء نقي وطلب المليحه
ويوم تفكر تهينها
تفكر الاول تحت رجليها الجنه
ؤ هي سباب وجودك فدنيا
وثانيه لعمرك شريكه
نصك الاخر بها يكمل ديما
والثالثه نبته زينه
من اصلك نابعه
يلاه نتعلم نعيش باحلى عقليه
هي لك رفيقه ؤ نعمه
و انت باصلك كريم
ؤ فيك الرحمه
نخرج من ضلام جهل الوراثه
لنور الاحترام لي يدوم بينا
.
عماد والحاج
.
فيديو القصيده على اليوتوب
https://youtu.be/P4t_MhlLurI