زجل مغربي بعنوان :زين بلادي

زين بلادي
ياالريح الهايمة
فسما لعشاق طايرة
فوگ الجبال العالية
سقسي السحاب ينزل قطرة
ويعطيك من كل مدينة نظرة
من الشمال  شع شعاع الزين
بنت الأصل ديك الطفلة
يازينها لما نسمع ديك اللكنة
روحي تهيم فوهواها
كلما زاد بهاها
ؤ ماتكمل لحلاوة
بلا العروسة وجدة
هديك الأرض  الزينة
بناتها شمعات مضوية
 حلاوة مقطرة من رحيق  الزهرة
والعسل يتشكل ف الحسيمة
هي مدينة محروسة
ريفنا ياناس بناتها مأصلة
الطيبة والمحنة
وياسلام على عيونهم الخضرة
تتشكل منها النجمه
وتكملها مراكش الحمرا
أرض الخير والبسمة
ناسها نفوسهم مبهجة
تضحك وتهدي الفرحة
كوردة بين كتبان رمال شامخه
جوها من حر مولع ك جمرة
يطفيه بحر اكادير بلكنة شلحة
بنات ماندم راجل لي حبها
وزنها بالدهب تكيلها
وماتوافيها حقها
شلحة بلباسها
وبناس لي بلمتهم تزينها
أرض الطبيعه الزاهية
ولفها من لعشق ماتقدر تفرقها
سفينتي هاج عليها مواجها
ردوني لرباط  العاصمة
تاريخ محفور بساسها
من البعد يزيد وحشها
تعرفها من حسان
صومعتها العالية
ويازين ديك المدينة بناسها
الزين رباطي يا زينها
تگول الگمر نزل فوق أرضها
تگول الشجرة تما تزهر ثمارها
عقول راقية بناتها
ماتسخى بفراقها
هاج الريح ودفع شراعي
بانت مدينة فالعوالي
ناسها تخدم بنهار وليالي
بها مرفوع اقتصاد بلادي
بلا منوصف أكيد عرفتو لغزالة ديالي
كازا يا العشق رباني
يعلو عليها مسجد الحسن الثاني
بناتها كي الريح الصيفي
ياخدك بعيد ويردك غاوي
عطشان من الحب باغي
ثما الزين زاد ميتين
ومن لحلاوة تغمض العينين
فقت فوق رمال
مدينة بزينها ياسلام
لوحة من صنع الإنسان
لباسهم غير كل البلدان
تشوف من بعيد جمال(البعير)
ويسحرك الزين بهبال
العيون يا حد الجفون
بك محمية هاد الاوطان
انت شاهدة على الأمان
فاس يا ساكنة لاحساس
اسفي يا الگلب الوفي
مكناس تاج فوق الراس
الناظور يا عش الطيور
وزان حبك مايحتاج ميزان
ورزازات يا أرض الابداعات
طنطان يانبع الحنان
تطوان يازينة الالوان
صويرة يالارض الجميلة
أصيلة ناسها مليحة
بلادي زينة من طنجة لگويرة
لواني زاهية من كل مدينة
عطيتكم لوحة مرسومة
فعدروني الى ماوفيت لكل وحدة
حقها
حروف من الگلب نابعه
فحب هاد البلاد وناسها
.
رابط القصيدة على قناةِ في اليوتوب:
https://youtu.be/J7gEcB1fnCY