زجل مغربي الموت

الموت
زرني ضيف
مابغا طعام
مخبرني  بقدوم
غير غفلة جاني
وعن بالي غايب
هادي سنين وعوام
مدق بابي
ولا شورني
تالگيت قدام
لروح باغي يدي
ب أمر من ربي
ساعتها داز فيلم طويل
حسيت قصير بالي
اعمالي كثيرة
والخوف برجفة شدني
حسيت حالى مضيوم
وتالدموع ما تريحني
شحال دنبت
وبعت ونافقت
كليت الحرام وكدبت
وبعت ناسي على ود وراق
باش نعيش الحياة
وهانا وصلت لاخر حد
نشوف طريق ظلام
الحال يخوف عيني مصدومة
من هول لعداب
بديت نحاسب نفسي قبل مايجيني لملاك
لان عارف نفس صيگها جلاد
وانا نسول
فين الاحباب
فين المال والاصحاب
فين رفقة الليل وشراب
فين العود والكمان
فين الحياة الزينه لي عليها بعت
كلشي من زمان
كلشي وهم وسالات لاحلام
فين اشرف ومحمد وحسن
لي ديما ينصحوني بصلاة
وباعمال الخير وفعينهم دمعه
وبجهل مني نرد بصرخه
خلوني نعيش
خلوني نحيا
خلوني نتمتع فكل لحظة
فين أمي السهرانه
بايته بلا نعاس عليا مخوفه
ونرجع ليها نتمايل وريحتي خانزة
وهي فكل لحظة ترفع يديها بدعوه
فين بويا لي ضهرو محني
ثمنى ولدو لي ربا
بغاه راجل حداه
يوم تخون الصحه
فين عمامي وخوالي واهلى وحبابي
لي قطعت معاهم صلة الرحمة
فين فين فين..... صوت مدفون
كفن ابيض وفقيه للقرآن يرتل
فلحم يغسل وانا نفس تأنأن
تصرخ ردوني للخير نعمل
ضاع الوقت مابقا رجوع يابنادم
عليا صلاو وكلشي يترحم
سايگيني لبيت الاخر
شبر
وتراب وحجر
وكلشي غادي يرجع
ونبقى وحيد نتألم
ونغوت
فينكم
رجعو
ردوني
راني تعلمت
وأمي ياك قلبك رحيم
بويا ياك صبرك عليا طال
خويا يا لي مشاركني الدم
صحابي يالي وعدتوني
عليا متخلاو
فينكم
فينكم
فينكم
وانا نسمع
الله يرحم المرحوم
وعام ورا عام
نساو الاسم
وجسد مابقا فيه غير العظم
تا حد ساعتها بحالي ماعالم
واش فجنة ولا جهنم عايم
ورب أرحم من الأم
وهو أرحم الرحمين
نرجع له بثوبة
گبل متكون اخر شهقة
.
.
رابط القصيدة في اليوتوب ...
https://youtu.be/XOAdYv5WAOs