زجل مغربي بعنوان (بغيت رد)

بغيت رد

عندنا خروف
دبحاتو گاع البلدان
ستاغالوه كعنوان
لي ضعاف يدفعو لگدام
يرفع ليه السميه فالميدان
عتقوه مسكين غارق احزان
دم سايل ويدان
فجرائد ولقاءات وتجمعات الاوطان
ماعندهم دم
ماهازين هم
المصالح تتكلم
ويگول اهل فلسطين ولاد العم
اش قدمتو لهم من دعم..!
واش حررتو شي شبر... ؟
واش زرعتو فوق ارضها ورد... ؟
واش مديتو لهم  اليد...؟
موتاهم  ماحاس بهم  حد
استغلاليين ياعرب
ويوم الحساب
نفاقكم غادي يشهد
على ريوسكم لي مزال تتمرمد
كنعامه خاشينها فالأرض
وتگول النخوة والعزة حنا أهلها للأبد
للحساب معايا شد
العراق تتمرمد
ليبيا اهلها ردوها عواصف
من برق ورعد
تونس جارفها واد
يلعب بها بين جزر ومد
مصر حاكمها وغد
ومزال مكفرت الدنب
سوريا مزالها تتعدب
وجرحها زايد
بورما تتباد
بدون سباب
تعالو نشرب شراب
ونتمرمد فتراب
حنا مضامنين
نعم السلام وهما هازين سلاح
نعم للحب وقرطاسهم فينا يتقب
على الشجاعه فقاموسنا
خاصني نشطب
للكتاب سد
لأن تاواحد
ميقدر على أسإلتي يرد